François Bloemhof

Dié afdeling kry in die middel van elke maand iets nuuts by. Kom loer dus gereeld vir uittreksels, kortverhale, gedigte of wat ook al.

Augustus 2010

Elektroniese boeke ... Wat is dit en hoe werk dit?

Bloemhof het die laaste tyd meer en meer die term "e-Boeke" raakgelees, maar nie regtig geweet waaroor dit gaan voordat Lapa Uitgewers hom laat weet het dat hulle 'n paar van sy boeke, asook ander skrywers s'n, as eBoeke gaan uitgee nie. Dit is 'n eerste in Suid-Afrika, en Bloemhof se Spinnerak was nou inderdaad die heel eerste Suid-Afrikaanse boek wat op dié manier beskikbaar gestel is.

Joernalis Stephanie Nieuwoudt omskryf die term in 'n artikel vir Absa soos volg:

"These nifty devices are gaining ground amongst bookworms who cannot bear the thought of being stuck somewhere without having something to read. An e-reader offers one the opportunity of always having a variety of books at hand ... It is an electronic, wireless device that is about the same size as an average paperback novel and weighs only a few grams ...

"Is the text too small? No problem. By simply pushing a button, you can enlarge the text for ease of reading. You can even choose the font (or typeface). And if you like a certain passage in the book, there is a storage function so that you can easily call up the passage whenever you want to. Are you unsure of the meaning of a specific word? Call up the dictionary and you will have an explanation in no time."

In 'n nuusuitreiking deur Lapa Uitgewers sit hulle hul benadering soos volg uiteen:

"Lapa se eerste 25 eBoeke sal vanaf Julie op Kalahari.net aangekoop kan word. eBoeke is relatief nuut tot die Suid-Afrikaanse boekhandel, hoewel vroeë bekeerdes al vir jare eBoeke deur internasionale webblaaie aankoop. Deesdae is eBoeke baie meer sigbaar onder die Suid-Afrikaanse publiek, en eBoek-verkope aan Suid-Afrikaners styg merkbaar.

"Hierdie toenemende bewustheid skep 'n sterk dryfveer vir plaaslike uitgewers om internasionale tendense na te volg deur in eBoeke te belê. Lapa sien hierdie nuwe verwikkeling egter ook as nóg 'n manier om Afrikaanssprekendes oorsee van goeie Afrikaanse boeke te voorsien.

"As daar gekyk word na verkoopspatrone in Amerika en Europa, sal topverkoper-fiksie, romanses en spanningsverhale waarskynlik die beste verkoop onder die algemene publiek. Dis is waarom Lapa 11 liefdesverhale deur die mees gewilde skrywers sowel as vier spanningsverhale deur die bekroonde spanningsverhaalskrywer François Bloemhof en Riana Mouton in eBoeke omskep het.

"13 Spookstories is 'n voorbeeld van 'n splinternuwe boek wat skuins voor sy eBoek-weergawe verskyn het. Boeke wat uit druk uit is, maar wat steeds publieke belangstelling uitlok, is egter ook ideale kandidate vir eBoeke, byvoorbeeld die kookboek Kook Afrikaans!

"Volgens Arthur Attwell van Electric Book Works, bied die ontstaan van 'n wye verskeidenheid Afrikaanse eBoeke baie vir Afrikaanse literatuur, onder meer 'toenemende buigsaamheid, kostebesparings, voordele vir die omgewing, en onmiddellike beskikbaarheid – dinge wat lank reeds vir Engelse lesers 'n werklikheid is'."